Führungen mit Schaulklassen

Museumspädagogik_EMM

Use gröine Klassenruum – ideaol äs Butenleernoort

Befasset man sück mit dät Thema Moor, is de Spännung all vörprogrameert – denn Fraogen dortau güff et genaug: Worut bestaiht Moor, wat is Törf? Wo baauet man äin Huus in’n Moore? Wat häff de gröttste Plaug van de Welt hier äigentlick maoket? Worümme bünt de Moorpoggen mitunner blaau? Un güff et hier wüddelk fläigende Drächen?

Wi bäiet de Kinnergordenkinner, de Schöilkers un de jungen Lüüe nich nur de allgemäine Führung dör’t Äämsland Moormuseum un use Butengeländ än (mit un sünner Feldbaohnfohrt), wi häbbt uk noch ’n affwesslungsrieket Programm dortau. Use museumspädagogisken Ängebotte bünt handlungsorienteert un än den Leitspräöke van use Museum – „Moor in ’t Spännungsfeld van Natur un Technik“ – utrichtet. Je nao Vermaok un Öller weerd verschaidene Aspekte van den Lääwens-, Natur-un Arbaitsruum unner fäckkunnige Begleitung vermiddelt. Paraollel tau’n Schaulunnericht weerd dät Wääten, dät all dor is, noch däiper maoket.

Tipp: Nao Affspraoke bünt uk Projektdage mäögelk, de den häilen Däg duert

 Siedlerdäg

Kinner un junge Lüüe käönt in Trupps ‘nen Vörmiddäg up’n Siedlerhoff taubrengen un bekaomt so ’nen Indruck van dät Lääwen in vlääten Tieden. De Vörmiddäg fänget än mit dät Inkläien. Updäilt in Trüppken, helpet de Däilnäähmer de Buernfrau bie de Arbait, bestellet den Buerngorden, plücket un saiet Gemöise un versorget mit Hölpe van de Dierflegerin de Diere van’n Hoff. De Arbait in’n Hochmoor hörde uk tau de Hoffarbait. Äin gemäinsamet Middägääten is de Verdenst för de Arbait un den Lääwensunnerholt, den man so affsichert här.

Änraoen för: Grundschaulen, Sek. I (Klassen 5./6.)
Höchste Däilnäähmertaohl: 25 Schöilker (tauminnsten 14 Schöilker)
Duer: ca. 5 Std. (Klock 8.30 bis lock 13.30)
Pries för äinen Schöilker: 8,20 Euro

Wat wään mott: tauminnsten 1 Begleitung, fastes Schauhwärk, Fröihstücksbroote bidde mitbrengen,

Natürlick stellt wi uss nao Affspraoke up religiös aff änners motiveerte Äätgewohnheiten in.

 Diere än’n Siedlerhoff

„Wat wi hollen willt, mäöt’t wi uk ääten.“ Düssen Käägenspräöke maoket sogor Sinn, wenn man up den Erhalt van Huusdieroorten in use Tied kick. In dütt Programm wieset wi, wecke heimisken, van’n Utstärwen bedrauhten Huusdieroorten bie uss ’n näiet Tauhuus funnen häbbt un worümme.

Änraoen för: Grundschaulen
Höchste Däilnäähmertaohl: 25 Schöilker
Duer: ca. 1,5 Std.
Pries för äinen Schöilker: Führung, Museumsintrett

Wat wään mott: Je nao Grötte van de Truppe tauminnsten 1 Begleitung

Tipp: Dütt Programm bäiet wi uk för Kinnergordenkinner än, natürlick för eer Öller!

 Labor in’n Moor

Moorlieken güff et bie uss wall nich – vermauet wi. Man et güff ampat up’n Hochmoorpand spannende Saoken tau entdecken – dät wäätet wi. Äs Moorforscher leert de Schöilkers unner fäckkünnige Leitung de Besünnerheiten von Moor un Törf in kläine Experimente kennen. Tau’n Affschluss baauet de Truppe mit dät wat säi leert häbbt eer äigenet Minimoor för de Klasse nao. Düsse Veranstaltung mochte mit dät, wat man in den besünneren Lääwensruum Moor näi dortau leert häff, ‘nen Vermaok för den Naturschutz wäckermaoken.

Änraoen för: Grundschaulen, Sek. I
Höchste Däilnäähmertaohl: 25 Schöilker
Duer: 2,5 Std.

Pries för äinen Schöilker: Führung, Museumsintrett, Materialkosten 2,00 Euro extra för äinen Schöilker

Wat wään mott: Je nao Grötte van de Truppe tauminnsten 1 Begleitung

Tipp: Dütt Programm bäiet wi uk för Kinnergordenkinner än, natürlick för eer Öller!

 Äs Moordedektive unnerweggens

Wecke Planten un Diere lääwet in’n Moore, de bedrauhet bünt? Un worümme bünt äinige bedrauhet? Unner däi Tied van de kläine Hochmoor-Exkuursion weerd de Schöilker vääl gewohr äöwer de Besünnerheiten van düssen bedrauhten Natur-un Lääwensruum. De diergerächte Ümgang mit Käscher un Eerdfallen is nettso Beständdäil van’n Programm äs uk de Bruuk van Bestimmungsböiker in de Natur. Wi willt de Schöilker späälend up den Biotop-un Oortenschutz upmerksam maoken.

Änraoen för: Grundschaulen, Sek. I
Höchste Däilnäähmertaohl: 25 Schöilker
Duer: 2 Std.
Pries för äinen Schöilker: Führung, Museumsintrett
Wat wään mott: Je nao Grötte van de Truppe tauminnsten 1 Begleitung

Tipp: Dütt Programm bäiet wi uk för Kinnergordenkinner än, natürlick för eer Öller!

 Expeditschon dör Tied un Moor

Wat häff dät Moor mit Ies tau daun? Bie düsse Tiedraisen-Spääleräi krieget de Kinner ’ne Menge mit äöwer den Moorupbaau nao de leßte Iestied. Dornao gaiht et up Entdeckungstuur up dät Hochmoorpand.

Änraoen för: Kinner in de Grundschaule, Sekt. I (5./6. Klasse)
Höchste Däilnäähmertaohl: 10 Kinner
Duer: 2,5 Std.
Pries för äin Kind: 60,- Euro (inkl. Feldbaohnfohrt)
Wat wään mott: 1 Begleitung

 Rund üm ’t Schaop

Use Benthemer Schaope häbbt ’ne härtfuchtige Natur un finnet up den kräöpeligen Moorgrund genaug tau frääten. Man wör dät Lääwen in’n Moore mit Schaope wäärmer? Bie uss leert de Kinner de riekelke Diernutzung kennen un dauet laoter hen uk filzen. – Äin gänz persönlicket Ändenken för Tauhuus.

Änraoen för: Kinner in de Grundschaule
Höchste Däilnäähmertaohl: 10 Kinner
Duer: 2 Std.
Pries för äin Kind: 50,- Euro (inkl. Material)
Wat wään mott: 1 Begleitung

 Unner de Lupe naohmen

Törfmoss lätt dät Moor wassen. Wo schaffet dütt lüddeke Pläntken dät äöwerhaupt? Mit kläine Experimente weerd in dütt Programm de besünneren Lääwensümstände van de Moore unnersocht. De Schöilker bestimmet wovääl Water dät Törfmoss upnäähmen känn, säi maoket Versöike üm de pH-Werte ruttaukriegen un säi leert den Ümgäng mit ’nen Binokular. Tauhope mit de experimentellen Arbaiten schöll bie dütt pädagogiske Ängebott dät genaaue Henkieken leert weern.

Änraoen för: Grundschaule (3./4. Klasse), Sek. I (5./6. Klasse)
Höchste Däilnäähmertaohl: 25 Schöilker
Duer: ca. 2 Std.
Pries för äinen Schöilker: Führung, Museumsintrett, Materialkosten 2,00 Euro extra
Wat wään mott: Je nao Grötte van de Truppe tauminnsten 1 Begleiter

Unner Damp

De Dampplaugsatz mit ’nen Däipplaug un de Lokomobile ‚Thüringen‘ van de Firma Ottomeyer, de in’n Äämsland Moormuseum in Huse bünt, is äin wiet äöwer ’t Äämsland bekanntet technikhistorisket Denkmaol. Man wat is äigentlick de Unnerschäid tüsken ’ne Lokomotive un ’ne Lokomobile? Un wo settet so ’ne Meschine Water in Bewäägung üm? In dütt Programm weerd de Schöilker ’ne Menge gewohr äöwer de Dampkräft äs Motor in de Industriellske Revolution. Dornao baauet de Schöilker äin Dampboot, üm äis maol häil genaau tau säihn, wo so ‘ne Dampmeschine äigentlick funktioneeren dait.

Änraoen för: Grundschaule, Sek. I (5./6. Klasse)
Höchste Däilnäähmertaohl: 25 Schöilker
Duer: ca. 1,5 Std.
Pries för äinen Schöilker: Führung, Museumsintrett, Materialkosten 2,00 Euro extra
Wat wään mott: Je nao Grötte van de Truppe tauminnsten 1 Begleiter

 Noit aohne Säipe wasken

In düsse Veränstaltung verkloort wi, worümme äinige Landkorten in’n Museum schäif hanget un worümme de Landvermääter in’n Äämsland lange Stöcker drögen. Dornao erkunnet de Schöilker use Fräigelände un legget ’ne äigene Korte än. Den Ümgäng mit ‘nen Kompass un dät Änleggen van ’ne Legende leert säi dorbie uk, un zwar up dät Pand van use Butengelände.

Änraoen för: Sek. I (5./6. Klasse)
Höchste Däilnäähmertaohl: 25 Schöilker
Duer: 2 Std.
Pries för äinen Schöilker: Führung, Museumsintrett, Materialkosten 1,50 Euro extra
Wat wään mott: Je nao Grötte van de Gruppe tauminnsten 1 Begleiter

Waohnen un Arbaiten in’n Moore

Themenführung

Mit de Gründung van 14 Moorkolonien än’n Ende van’t 18. Johrhunnert föng up de dütske Siete de Besiedlung un weertskuplicke Nutzung van’n Bourtanger Moor än. Dät Lääwen fan de eersten Siedler wör härt, bis vandage häff sück eer Sinnspräöke „Den Eersten den Dood, den Twäiden de Noot, den Därden dät Broot“ hollen. Düsse Themenführung sett sienen Schworpunkt up dät Wohnen un Arbaiten van de Törfbuern in’n Äämsland.

Änraoen för: Sek. I, Sek. II
Höchste Däilnäähmertaohl: 25 Schöilker
Duer: 1,5 Std.
Pries för äinen Schöilker: Führung, Museumsintrett
Wat wään mott: Je nao Grötte van de Truppe tauminnsten 1 Begleiter

In äigene Saoke

Äinige van use museumspädagogisken Ängebotte finnet in’n Siedlerhuus stätt. Dät is nich böitet. Dorümme raoet wi, in de köihle Johrestied partuu ’nen extra Pullover off dicke Jäcke mittaubrengen. Dor wi in use Region faoken mit Räägen off mit kotte Schuurs rääken mäöt, bünt faste Schauhe (vlichte uk. Stääwel) un ’ne Räägenjäcke raotsam. Drinkeräi un Ääten dröfft geere mitbrocht weern, man känn aober uk dät Ängebott van’n Museumscafe nutzen. De Upsichtsflicht in’n Museum un uk in’n Butengelände ligg bie de Schaulmesters un bie de Lüüe, de de Kinner begleitet. Et is partuu dorup tau achten, dät dät Kläddern up de Gerätskup un up de Meschinen nich wään dröff, üm kiene Plieten afftaukriegen. Bie Schaulklassen un Jugendtrupps äöwer 15 Lüüe weerd ‘ne twäide Begleitung bruket. Bie Trupps äöwer 20 Lüüe is gor ‘ne därde Begleitung wünkenswert.