Leitbeld

Dät Äämsland Moormuseum ligg in de Gemäinde Geeste in de hollandske-dütske Grensgäägend midden in den Internationaolen Naturpark Bourtanger Moor-Bargerveen. Et güff hier äin 30 ha grootet Butengelände mit ‘n renatureertet Hochmoorpand un ’ne Siedlerstääe, de man aaltauhope mit ’ne Feldbaohn un äöwer Bohlenwegge recken känn. Twäi näimöidske Utstellungshallen mit tauhope 2500 m2 Utstellungsflächen un äin Museumsweertshuus (Cafe) höört uk noch tau’t Moormuseum. Dät öffentlicke Wärk van’t Äämsland Moormuseum is dät Sammeln, Bewohren, Forschen un Vermiddeln van Sachkultur tau de Themen Moor un Törf in den noordwestdütsken Ruum. Dät Museum orienteert sück dorbie än de Vörgaben van’n International Council of Museums (ICOM), van‘n Dütsken Museumsbund un van‘n Museumsverband för Neddersassen un Bräämen e.V.

In Tüskentied is et dät gröttste europä’ske Moormuseum un fleget ’ne äinzigoortige Sammlung tau de Moorentstehung-, entwicklung-un –kultiveerung, tau de Besiedlung, de man Äämslandplaon nöimt, tau de Törfwinnung un –verarbaitung un tau’n Moorschutz un tau Fraogen van de Renatureerung. Binnenin van düsse Sammlung nümmp de Fäckbiblioteek mit äöwer 10.000 Böiker, de bis in dät 17. Johrhunnert trügge recket, äine gänz besünnere Rulle in. Dät Äämsland Moormuseum is äs Museums-un Forschungsstandoort in Dütskland und in’n Utland bannig gaud änsäihn. Dät Museum arbaitet wäätenskuplick eng tauhope mit Forschungsinrichtungen, Universitäten, Fäckorgarnisationen un mit Schaulen. In de Region mit siene Mensken is dät Museum all lange däip veränkert. Dät weerd uk dütlick bie däi, de den Museumverein drääget – de Politik, de örtlicke Heimatverein, de Äämsländ’ske Heimatbund un bekannte Lüüe ut de Region.

In’n Middelpunkt för aale Mitarbaiter van Äämsland Moormuseum staoht de Besöiker. Hier dauet aale dät, wat för de Gäste up äine Oort un Wiese nur mäögelk is. Dör etlicke museumspädagogiske Ängebotte känn man aktiv leern un dät groote Butengelände mit de in Naoberskup liggenden Moorstääen brenget flink Ruhe un man känn sück häilebest utrössen. De Utstellung up Duer un de Sünnerutstellungen bünt aale mit Hölpe van näimöidske Kommunikatschonsmiddel so upbaauet, dät säi Informatschon, Belääwnis un Pläseer taugliek änbäien dauet. Elke Mitarbaiter un elke Arbaitsstääe van’n Moomuseum häff dorbie siene gänz besünnere Bedüüung. Aale Mitarbaiter verföiget äöwer Kompetenz, Verlaot bie de Arbait, Vertraauen un käägensietige Akzeptanz in de Koppel. Nur so känn man de sück faoken wesselnden Änforderungen än äin Museum un siene Unverännerborkeit in ‘nen gauden Inklang brengen.

 

Fortbildungsfahrt

Die Mitarbeiter des Emsland Moormuseums bei einem Besuch der Zeche Zollern, Dortmund Bövinghausen.