Objektsammlung

Torffaserbuch

De Sammlung is alltied Hätte un Seele van elke Museum. Üm usen Auftrag gerächt tau weern – sammeln, bewohren, forschen un utstellen – weerd de Sammlungskäägenstände katalogiseert, fäck-un sachgerächt laogert un wenn et nödig is uk restaureert. Tüskenin güff et in use Sammlung all ca. 18.500 Objekte (van’n Lokomobile bis nao de Moorsäipe), de man siet de Gründung van dät Huus in de 1970er Johren tauhopedraogen häff; man et bünt noch nich aale Stücke katalogiseert.

Sammlungskonzept
Dät Sammlungskonzept van’n Äämsland Moormuseum nümmp, wat de Sammlungsschworpunkte ängaiht, Naosicht up de Vörgaben van’t dezentraole Museumskonzept van’n Landkreis Äämsland. Un dät alltied tauhope mit de themaotiske un inholtlicke Utrichtung van all de änneren äämsländ’sken Museen. Mit de reginaolen un äöwerregionaolen Museen tuusket man sück uk ut. Wat de Archivalien beträfft, stömmet man sück aff mit de Archive ut de Region (Neddersäss‘sket Staatsarchiv Ossenbrügge, Neddersäss‘sket Staatsarchiv Ollnborg, Drents Archief Assen (NL) un mit dät Kreisarchiv Möppen). ‘Nen äöwerregionaolen Uttuusk mit Kulturinstitutschonen, de uk tau dütt Themengebiet forschen un sammeln dauet, häff man äöwer de Sektion 7, Landeskunde un Ümweltbeldung, van de Dütske Sellskup för Moor-un Törfkunde (DGMT).

Sammlungsschworpunkte
De themaotisken Schworpunkte mit eeren äigenen geografisken Fokus föiget sück tau äin Sammlungsbeld tauhope:

-Landes- un Siedlungskultur ut’t 17. un 18. Johrhunnert (Äämsland)
-Besiedlung un Kultiveerung vörindustrielle Tied (Noordwestdütskland)
-Änfänge van den technisken Törfaffbaau (Dütskland)
-Allgemäine Moor-un Törfkunde (Dütskland / Internationaol)
-Landes-un Siedlungskultur ut’t 19. un 20. Johrhunnert mit de Äämslanderschliessung nao 1945 (Äämsland)
-Törfwinnung- un Verarbaitung (Schworpunkt Dütskland, Internationaol)
-De techniske Törfaffbaau un Naturschutz (Dütskland)
-Weertskuplicke Bedüüung van de Moore (Äämsland, Dütskland, Internationaol)
-Internationaole Inordnung un Tauhopearbait (Internationaol)
-Strukturnücken (Internationaol)
-Besünnere Themen: Balneologie, Städtehygiene usw. (Dütskland)